നെയ്യഭിഷേകം ഇന്നും (ജനുവരി 18) കൂടി

 

 

ശബരിമല മണ്ഡല മകര വിളക്ക് മഹോത്സവത്തോടനുബന്ധിച്ച് ഭഗവാനുള്ള നെയ്യഭിഷേകം ഇന്ന് (ജനുവരി 18) രാവിലെ 11 ന് അവസാനിക്കും. തുടര്‍ന്ന് പന്തളം രാജപ്രതിനിധിയുടെ സാന്നിദ്ധ്യത്തില്‍ കളഭാഭിഷേകം നടക്കും.

 

 

ദീപാരാധനയ്ക്ക് ശേഷം പടിപൂജയുണ്ട്. രാത്രി കളമെഴുത്തും വിളക്കെഴുന്നള്ളിപ്പും. ശരംകുത്തിയിലേക്കാണ് എഴുന്നള്ളിപ്പ്. ജനുവരി 19 ന് കുറച്ച് ദ്രവ്യങ്ങളുടെ അഭിഷേകം മാത്രമാണ് ഉണ്ടാവുക. അന്ന് രാത്രി വരെയാണ് ഭക്തര്‍ക്ക് ദര്‍ശനം. രാത്രി അത്താഴപൂജയ്ക്ക് ശേഷം പന്തളം രാജപ്രതിനിധിയുടെ സാന്നിദ്ധ്യത്തില്‍ മാളികപ്പുറത്ത് ഗുരുതി നടക്കും.

 

ഭഗവാന്റെ ഭൂതഗണങ്ങള്‍ക്കും മലദൈവങ്ങള്‍ക്കുമാണ് ഗുരുതി. ജനുവരി 20 ന് രാജപ്രതിനിധിക്ക് മാത്രമാണ് ദര്‍ശനം. ഗണപതിഹോമത്തിന് ശേഷം ശബരിമല മേല്‍ശാന്തി അയ്യപ്പ വിഗ്രഹത്തില്‍ വിഭൂതിയഭിഷേകം നടത്തി ഹരിവരാസനം ചൊല്ലി നട അടയ്ക്കും. തിരുവാഭരണ പേടകം വഹിച്ച് പന്തളം സ്രാമ്പിക്കല്‍ കൊട്ടാരത്തിലേക്കുള്ള തിരുവാഭരണഘോഷ യാത്രയും രാവിലെ ആരംഭിക്കും.

 

ശബരിമലയില്‍ എത്തിയത് 50 ലക്ഷത്തിനടുത്ത് തീര്‍ഥാടകര്‍

 

 

മണ്ഡല മകര വിളക്ക് മഹോത്സവത്തോടനുബന്ധിച്ച് ജനുവരി 17 രാത്രി ഏഴു വരെ പമ്പ വഴി സന്നിധാനത്ത് എത്തിയത് 49,21,401 ഭക്തര്‍. സുഖദര്‍ശനം ലഭിച്ച സന്തോഷത്തോടെയാണ് ഓരോ തീര്‍ഥാടകരും മടങ്ങുന്നത്.

 

 

അധികനേരെ കാത്തുനില്‍ക്കാതെ ഭക്തര്‍ക്കെല്ലാം ദര്‍ശനം സൗകര്യം ഉറപ്പാക്കുന്നു. മകരവിളക്ക് മഹോത്സവത്തോടനുബന്ധിച്ച് ജനുവരി 19 ന് രാത്രി വരെയാണ് ഭക്തര്‍ക്ക് ദര്‍ശനം. ജനുവരി 20 ന് രാവിലെ 6.30 ന് നട അടയ്ക്കും. പന്തളം രാജപ്രതിനിധി മാത്രമാണ് അന്ന് ദര്‍ശനം നടത്തുക.

 

സംതൃപ്തിയോടെ ഭക്തര്‍ മല ഇറങ്ങിയതായി ശബരിമല, മാളികപ്പുറം മേല്‍ശാന്തിമാര്‍

ശബരിമല മണ്ഡല മകരവിളക്ക് തീര്‍ത്ഥാടനത്തിനെത്തിയ ഭക്തരെല്ലാം സംതൃപ്തിയോടെയാണ് മടങ്ങിയതെന്ന് ശബരിമല മേല്‍ശാന്തി ഇ ഡി പ്രസാദ് നമ്പൂതിരിയും മാളികപ്പുറം മേല്‍ശാന്തി എം ജി മനു നമ്പൂതിരിയും.

 

 

വളരെ ഭംഗിയായി മണ്ഡല മകരവിളക്ക് ഉത്സവം നടന്നു. സുഖദര്‍ശനം ലഭിച്ച സന്തോഷത്തോടെയാണ് തീര്‍ഥാടകര്‍ മടങ്ങിയത്. അധികനേരം കാത്തുനില്‍ക്കാതെ ഭക്തര്‍ക്കെല്ലാം ദര്‍ശനം സൗകര്യം ഉറപ്പായി.

 

അയ്യപ്പനോടുള്ള നിഷ്‌കാമഭക്തി തെളിയിക്കുന്നതാണിത്. ദേവസ്വം ബോര്‍ഡ്, പൊലിസ്, റവന്യു, ആരോഗ്യം തുടങ്ങിയ വകുപ്പുകളുടെ ഏകോപനമായ പ്രവര്‍ത്തനം കാര്യങ്ങള്‍ എളുപ്പമാക്കി.

 

അയ്യപ്പന്റെ അനുഗ്രഹത്തോടെ മറ്റൊരു മണ്ഡല മകരവിളക്ക് തീര്‍ഥാടനകാലം സമാപിക്കുന്നതായി എം ജി മനു നമ്പൂതിരി പറഞ്ഞു. എല്ലാ ഭക്തരും സംതൃപ്തമായ ദര്‍ശനം നടത്തി. ദേവസ്വം ബോര്‍ഡും വിവിധ വകുപ്പുകളും പൂര്‍ണ പിന്തുണ നല്‍കിയതിന്റെ ഫലമാണിതെന്നും അദ്ദേഹം പറഞ്ഞു