“പപ്പെറ്റ്സ് ഓഫ് ഇന്ത്യ” എന്ന വിഷയത്തിൽ തപാൽ വകുപ്പ് 8 സ്മാരക തപാൽ സ്റ്റാമ്പുകൾ അടങ്ങുന്ന ഒരു സെറ്റ് 2026 ഫെബ്രുവരി 13-ന് ന്യൂഡൽഹിയിലെ ഇന്ത്യൻ ഹാബിറ്റാറ്റ് സെൻ്ററിൽ പുറത്തിറക്കി. വിശിഷ്ടാതിഥികൾ, കലാകാരന്മാർ, സാംസ്കാരിക മേഖലയിലെ അംഗങ്ങൾ എന്നിവരുടെ സാന്നിധ്യത്തിൽ സെക്രട്ടറി (തപാൽ) വന്ദിത കൗൾ സ്റ്റാമ്പുകൾ ഔപചാരികമായി പുറത്തിറക്കി.
“നമ്മുടെ രാജ്യത്തിൻ്റെ പൈതൃകത്തിൻ്റെ ചെറു അംബാസഡർമാരാണ് തപാൽ സ്റ്റാമ്പുകൾ. ഇന്ത്യയുടെ സമ്പന്നവും വൈവിധ്യപൂർണ്ണവുമായ പാവകളി പാരമ്പര്യത്തെ ആഘോഷിക്കുന്ന ഈ പ്രത്യേക പതിപ്പിലൂടെ തലമുറകളായി നമ്മുടെ നാടോടിക്കഥകളും മൂല്യങ്ങളും കൂട്ടായ ഓർമ്മകളും സംരക്ഷിച്ച കാലാതീതമായ കഥാകാരൻമാരെ ഞങ്ങൾ ആദരിക്കുന്നു. ഇന്ത്യയുടെ ഊർജ്ജസ്വലമായ സാംസ്കാരിക പൈതൃകത്തോടുള്ള പുതുമയേറിയ മതിപ്പിന് ഈ സ്റ്റാമ്പുകൾ പ്രചോദനം നൽകട്ടെ. ഭാവി തലമുറകൾക്ക് ഈ ജീവിക്കുന്ന പാരമ്പര്യങ്ങളെ പരിപാലിക്കാനും നിലനിർത്താനും ഇത് പ്രോത്സാഹിപ്പിക്കട്ടെ” എന്ന് ചടങ്ങിൽ സംസാരിച്ച സെക്രട്ടറി (പോസ്റ്റ്) പറഞ്ഞു.
രാജ്യത്തെ ഏറ്റവും പഴക്കമേറിയതും ഊർജ്ജസ്വലവുമായ കഥാഖ്യാന പാരമ്പര്യങ്ങളിൽ ഒന്നാണ് ഇന്ത്യയിലെ പാവകളി. അതിൻ്റെ സമ്പന്നമായ സാംസ്കാരിക വൈവിധ്യവും കലാചാതുര്യവും ഇതിൽ ഉൾപ്പെടുന്നു. നൂറ്റാണ്ടുകളായി, സംഗീതം, ആഖ്യാനം, ദൃശ്യകല എന്നിവ സമന്വയിപ്പിക്കുന്ന ആകർഷകമായ പ്രകടനങ്ങളിലൂടെ ഇതിഹാസങ്ങൾ, നാടോടിക്കഥകൾ, ധാർമ്മിക അധ്യയനം, സാമൂഹിക വിവരണങ്ങൾ എന്നിവയ്ക്ക് ജീവൻ നൽകിയിട്ടുണ്ട്.
ഇന്ത്യയിലെ പരമ്പരാഗത പാവകളെ നാല് രൂപങ്ങളായി തിരിച്ചിരിക്കുന്നു – ചരട്, കയ്യുറ, വടി, നിഴൽ പാവകൾ – ഓരോന്നിനും അതിൻ്റെതായ വേറിട്ടുനിൽക്കുന്ന ശൈലിയും പ്രാദേശിക സ്വഭാവവുമുണ്ട്. കുടുംബപരമായി കൈമാറിവന്ന ആഴത്തിൽ വേരൂന്നിയ പാരമ്പര്യത്തിലൂടെയാണ് ഈ അമൂല്യമായ കലാരൂപം നിലനിൽക്കുന്നത്, കുട്ടികൾ അവരുടെ മുതിർന്നവരെ നിരീക്ഷിച്ചും സഹായിച്ചും പഠിക്കുന്നതുപോലെ, കഴിവുകളും കഥകളും ഒരു തലമുറയിൽ നിന്ന് അടുത്ത തലമുറയിലേക്ക് കൈമാറ്റം ചെയ്യപ്പെടുന്നു.
ഈ സ്മാരക പതിപ്പിൽ എട്ട് സ്റ്റാമ്പുകൾ ഉൾപ്പെടുന്നു, അവയിൽ ഓരോന്നും ഇന്ത്യയിലെ വിവിധ പ്രദേശങ്ങളിൽ നിന്നുള്ള വ്യത്യസ്തമായ പരമ്പരാഗത പാവകളി രൂപങ്ങളെ പ്രതിനിധാനം ചെയ്യുന്നു. അതായത് കട്പുത്ലി (രാജസ്ഥാൻ), യക്ഷഗാന സൂത്രഡ ഗൊംബയട്ട (കർണാടക), ഡാംഗർ പുതുൽ (പശ്ചിമ ബംഗാൾ), കാതി കുന്ധെയ് (ഒഡീഷ), ബെനിർ പുതുൽ (പശ്ചിമ ബംഗാൾ), പാവകഥകളി (കേരളം), രാവണച്ഛായ (ഒഡീഷ), തോലു ബൊമ്മലട്ട (ആന്ധ്രാപ്രദേശ്). ഓരോ സ്റ്റാമ്പും അതത് പാരമ്പര്യത്തിൻ്റെ സവിശേഷമായ വസ്ത്രധാരണം, രൂപം, പ്രകടന ശൈലി എന്നിവ പകർത്തുന്നു. ഇന്ത്യയുടെ വൈവിധ്യമാർന്ന പാവകളി രീതികളുമായി ബന്ധപ്പെട്ട കലാപരമായ കരകൗശലവും സാംസ്കാരിക പൈതൃകവും പ്രദർശിപ്പിക്കുന്നു.
സ്റ്റാമ്പ്, ഫസ്റ്റ് ഡേ കവർ, ബ്രോഷർ, മിനിയേച്ചർ ഷീറ്റ്, ഷീറ്റ്ലെറ്റുകൾ, സ്പെഷ്യൽ ക്യാൻസലേഷൻ എന്നിവ രൂപകൽപ്പന ചെയ്തത് ശംഖാ സാമന്തയാണ്. പതിപ്പിനായുള്ള കലാപരമായ റഫറൻസുകളും, എഴുത്തുകളും സംഗീത നാടക അക്കാദമി; ഇന്ദിരാഗാന്ധി നാഷണൽ സെൻ്റർ ഫോർ ദി ആർട്സ്; ദരീച്ച ഫൗണ്ടേഷൻ; ഇഷാര പപ്പറ്റ് തിയേറ്റർ ട്രസ്റ്റിൻ്റെ സ്ഥാപകൻ ശ്രീ ദാദി പുദുംജി എന്നിവരാണ് നൽകിയത്.
